OGE 2011, MTCI Ezekuta Ona 80%

Ministru Turismu, Comercio no Industria (MTCI) ejekuta ona 80% Orsamentu Geral Estadu (OGE) tinan fiscal 2011 ne’ebe aloka ba ministeriu refere.

‘Ami Implementa ona ne’e iha projetu sira nebe mak halai ba turismu k o m u n i t a r i u, transferensia tau halao atividade turistika sira ne’e lao ona, halao mos ba iha atividade kontrola Mercado, no mos ba iha sasan importasaun ba ministerio edukasaun maibe ida ne’e mos avalia p r o s e s u aprovisionamentu hotu ona atu komesa dadaun ona “, dehan Ministru Turismu, Comercio no Industria, Gil da costa Alves ba jornalista sira iha ninia servisu fatin, Dili, kinta (4/8).

Gil Alves esklarese katak, iha ezekusaun iha desafiu bo'ot maka mudansa de sistema. Nia esklarese tan, iha OGE 2012, MTCI hakarak husu tan miloens 40 USD, maibe tuir pakote fiscal provolta milioens 23 USD ou sa’e liu ba mak milioens 25 USD. cal

Investidores Portugues Investe Turismu TL

Investidores husi Prtugues afirma ba Governu Timor Leste katak, sira iha komitmentu no hakarak atu investe iha area turismo Timor Leste nian.

Komitmentu ne’e hato’o husi Presidenti Konselhu Geral ba Asosiasaun Industria Portuguesa Jorge Matos, Presidenti Konselhu Administrasaun ba Turismu Madeira, Joao Pedro Entrudo no mos Adjuntu Direktor Banku Espiritu Santo, Miguel, ba Vice Primeiro Ministru Jose Luis Guteres iha Palacio do Governu, Segunda (25/7).

Delegasaun ne’e, halo visita Timor leste, tamba organiza husi representante adidu Timor Leste iha Lisboa, sira lori emprejarios sira mai para hare investimentu iha Timor Leste.

Tuir Vice PM Joce Luis nebe simu investidores sira ne’e hateten, asosiasaun emprejarios Portugues ne’e funsiona tinan barak ona, i iha emprejarios barak maka hakarak mai investe iha Timor Leste.

“ Investimentu ne’e iha area barak i inclui mos investimentu turismo, sira husi Madeira, nia rai ke’e hanesan mos Timor Leste, i sira nia Turismo iha Madeira mos kuinesidu teb-tebes i sira pronto para ajuda ba ita, atu treina ita nia ema, para aban bainrua desenvolve industria Turismu iha rai laran, “katak Vice PM Jose Luis.

Vice PM Jose Luis koalia, emprejario sira husi Portugues ne’e hahu kontaktu ona ho area ne’ebe sira atu investe ba, maibe Timor Leste presija kolia tan atu hare ba investimentu sira ne’e.

“Governu iha politika ida katak, ita hakarak investimentu mai husi rai liur, ita iha mos kontituisaun replubika hateten katak, Timor Leste ne’e halo relasaun diak ho pais CPLP, maibe ita koalia buat ida ne’e laos diskursu politiku, mas ita presija mos prepara kondisoens investimentu mai husi pais CPLP ne’e diak liu tan, nune’e bele halo parseria ho ita nia emprejarios nasional, para ajuda kria empregu iha ita nia rai laran no ajuda desenvolve ekonomia ita nian, “koalia Vice PM Jose Luis Guteres.das

Distritu 2 Fornese Ona Hare Kulit iha Armajen Estado

Gestor produtu lokal, Ministeriu Turismu Comersio no Industria (MTCI), Fernando Sousa hateten, desde iniciu programa “Povo Kuda Governo Sosa” ne’e lao iha loron 1 Julho, foin lalais ne’e, to’o agora foin mak Distritu rua mak fa’an nia produtu lokal mai MTCI.

“Ami nia osan produtu lokal husi distritu rua hanesan Maliana ho Ermera ne’e Osan ne’e hanesan osan cash dala ruma ami uza fali ba kompras ka sosa produtu lokal, atende ba kustu operasional no ida seluk hare’e ba nesesidade balun” dehan Fernando Sousa Ba JNDiario iha ninia servisu fatin Bebora, Dili, foin lalais ne’e.

“Iha tinan ida ne’e produtu lokal sira ne’e mak ita sosa tinan kotuk ita sei kontinua sosa ida nafatin produtu sira ne’e kompostu husi batar, fos rai, mina nu’u, fore rai, fore keli, no koto maibe iha eliminasaun oitoan tiha produtu seluk, batar, fore keli, fore mungu no fore rai, “nia esklarese.

“Nia dehan, tan produtu lokal tinan ne’e menus, lahanesan ho tinan kotuk. Tamba iha tinan ne’e klima no desastre naturais fo afeita hodi estraga buat barak. Ne’ebe dala ruma la konsege atinji buat ne’ebe mak MTCI atu sosa.

Oras ne’e dadaun foin fornesedor husi distritu rua ne’e (2) mak fornese ona sira nia produtu lokal hanesan Hare Kulit i Distritu rua ne’e mak hanesan Maliana, ho Ermera.

Produtu lokal ne’ebe tama makas iha armagen mak hare. Produtu sira seluk seidauk produtu ne’ebe mak iha armagen, MTCI halo kooperasaun ho ministeriu seluk, hanesan ho ministeriu Edukasaun (ME) atu apoio fos rai kona ba merenda eskolar ninian. Halo mos kooperasaun ho Ministeru Saude (MS) atu hare akordu iha tinan kotuk, para hare transformasaun aihan batar ba naturais ne’ebe sei transforma ba batar ut.

Dosente Agrikultura Universidade Nasional Timor Lorosae (UNTL), Carlito Soares hateten, produtu lokal ne’e mak MTCI sosa husi agrikultor sira. MTCI tenke halo kooperasaun fali ho Ministeriu Edukasaun (ME), Ministeriu Saude (MS) no mos ho Ministeriu Solidaridade Sosial (MSS) para produtu lokal sira ne’e labele sai at iha armagen laran diak liu aihan sira ne’e distribui ba ministeriu tolu ne’e hodi implementa ba iha sira nia programa hanesan merenda eskolar, ajuda desastre naturais no aihan ba hospital.

Nia hatutan katak atu prosesu sosa produtu lokal ne’e lao diak tenke iha kooperasaun husi MTCI ho Ministeriu Agrikultura e Pescas (MAP). Tamba, agrikultor barak mak kestiona konaba sira nia produtu local ne’ebe mak produs ona maibe husi parte MTCI nian la ba sosa. cal

Cristo Rei Fatin Favorit Ba Turista

Director Nacional Turismu MTCI, Jose Quintas hatete fatin turismu nebe durante ne’e sai favorit no hetan vizita barak husi turista sira mak Cristo Rei Area Branca, Dili.

“Iha fin semana, fatin turismu Cristo Rei laos deit ema estranjeiro mak vijita ba maibe, turista domestica mos gosta ba vizita fatin turismo ne’e,”

Tuir Jose Quintas, turista sira gosta ba Cristo Rei tamba fatin ne’e furak, dalan diak, no mos fasilidade nebe governu prepara iha neba mos diak ona.

Alende Cristo Rei, fatin turismo seluk nebe mos hetan vizita barak mak Arte Zenatu iha Liquisa, Hatubuilico, Ramelau okos, ilha Jaco (Lautem), Matebian okos.

Fatin sira ne’e potensial teb-tebes atu atrai turista sira atu vizita ba neba.

Fatin turismo seluk iha distritu balun mos bele atrai turista ba, maibe problema mak kondisaun Estrada nebe aat sai razaun turista siras atu vizita ba.

Sector turismo durante ne’e fo kontribuisaun bo’ot ba dezemvolvimentu nasaun, tamba liu husi aktividade turista sira mos hatama rendimentu bo’ot ba kofre estadu.

“Rendimentu sira ne’e tama liu husi taxa, vistu, otel; transporte no seluk-seluk, nebe durante turista sira ne'e sei iha Timor Leste, momentu nebe mos osan sei tama ba Timor Leste,”

Sektor turismo bele lao maka’as liu tan iha future, governu presija hadia infrakstrutura.

MTCI Sosa Ona Hare Kulit Toneladas 500

Hahu husi loron 1 to’o 20 Julho, tinan ne’e, Ministerio Turismu, Comercio e Industria (MTCI) sosa ona hare kulit toneladas 500 husi povu agrikultor sira. Gestor Produtu Lokal MTCI, Fernando Sousa informa katak, hare kulit hirak ne’e tama iha armazen guvernu iha Bebora hamutuk toneladas 300 no iha armazen Maliana iha toneladas 200. Durante ne’e MTCI sosa produtu lokal husi povu sira mak hanesan, batar, hare kulit, koto, forekeli, no foremunggu. “Produtu lokal hirak ne’e MTCI sosa hodi distribui tutan ba Ministerio Edukasaun hodi suporta programa merendar eskolar,” Fernando Sousa informa ba JNDiario iha ninia servisu fatin, Bebora/Dili, Kuarta (20/7). Nia esplika katak, maske povu iha produtu lokal, maibe lagarante atu hapara inportasaun fos, tamba produsaun ne’ebe iha seidauk sofisiente atu responde nesesidade nasional.cal

Governu Sosa Hare Kulit US$ 0.70/Kilo

Ministeriu Turismu,Comersiu, no Industria (MTCI) deside ona atu estabelese hikas programa “povu kuda guvernu sosa” iha loron 1 Julhu 2011. Liu husi programa “povu kuda guvernu sosa” ne’e MTCI sei sosa produtu local povu agrikultura nian, hanesan hare kulit, batar, foremungu, koto, forerai, forekeli, kinur ho ai-lia.

MTCI mos deside ona folin ba produto hira ne’e hanesan hare kulit kilo ida (US$0.70), batar (US$0.65), forekeli (US$0.90), foremungu (US$01.20), koto (US$3.50), forerai (US$2.25), kinur (US$0.10), no ai-lia kilo ida sosa ho US$2.20.

Jestor Nasional Produtu Lokal MTCI, Fernando Sousa informa katak, estabelesementu programa ne’e atraza oituan, tamba sei hein hela kompanha ne’ebe sei tomakonta atu ka’er programa ne’e, no sei hei orsamentu.

“Ami foin mak hetan osan transferensia husi Ministeriu finansas ba programa ne’e iha loron 8 Setembru 2010, tamba ne’e programa “Povu Kuda Governu Sosa” atraza oituan, “haklaken Fernando souse ba JNDiário iha nia serbisu fatin, Segunda(27/6).

Atu fasilita diak liu tan programa ne’e, Sousa esplika, MTCI sei loke oportunidade ba emprezario nasional atu bele konkore iha tenderizasaun ne’ebe sei hala’o iha 30 Junhu 2011.

“Sistema ba programa ne’e nia lalaok oinseluk ona ka halo mudansa. Parte diresaun sosa produto local sei la tun dereitamente ba iha baze ka ba iha povu sira nia to’os, maibe emprezariu nasional sira mak sei bat un iha baze hodi rekolha povu sira nia sasan ka produtu local,” Sousa hateten. lia

MTCI Identifika Kazu 50 iha Lalaok Negosiu

Ministeriu Turismu, Komersio no Industria (MTCI) identifika ona kazu 50 husi lalaok negosiu illegal ne’ebe akontese hahu’u husi Janeiru to’o Junhu, tinan ne’e.

Kazu 50 ne’e iha ligasaun maka’as ho negosiu illegal, lisensa negosiu nian mate no la halo renovasaun, ho mos kazu fa’an sasan liu prazu. Ernestu Monteiro, sub-Inspector Jeral Alimentar no Ekonomiku iha MTCI informa katak, ema hirak ne’ebe involve kazu ne’e hetan ona samada atensaun maka’as husi MTCI. “Husi kazu ne’e, MTCI kondena maka’as liu kazu sasan prazu, tamba ne’e iha ligasaun dereita ho ema nia vida,” afirma Ernesto ba JNDiário iha nia knar fatin, segunda (27/6).

Nia dehan, ba ema hirak ne’ebe ulun to’os nafatin hodi komete kazu hirak ne’e, MTCI sei foti medidas ka fo sansaun hanesan taka sira nia aktividade negosio nebe la iha lisensa.