Timor Post - Foos Kilograma 35 Laiha

Xefi Suco Husu Foo Fila Osan Restu

Dili – Xefi do Suco sira husu ba Ministeriu Turismu Komensiu no Industria atu foo fila povo nia osan nebe’e hatama ona iha Banku bainhira foti desizaun hapara distribuisaun foos liu husi autoridade lokal.

Xefi do Suco Fatuhada Marcelino Soares hateten, MTCI hasai DO ba recivu atu hetan foos no sira ba selu iha Banku ho $11,50 hodi hetan foos ho kilograma 35 depois fali hasai ho kilograma 25 deit tamba ne’e husu ba MTCI atu foo fila povu nia osan restu nebee hatama ona banku.

“Ami hatama osan $11,50 hodi hetan foos 30 kg maibe realidade depois hatun foos hetan mak 25 kg tamba ne’e povu sira ejiji mai ami atu entrega fali sira nia osan restu ho nune’e MTCI mak tenki responde, “ dehan nia, horseik. “Povu balun nia osan sei restu $7 no balun $1 iha banku hela, ne’e oinsa sei foo fila ka lae”.

Hanesan autoridade lokal, nia haktuir katak, sei kontribui bainhira MTCI mak dereitamente halo distribuisaun foos ba povu.

Sikun seluk, Cornelio Lopes hanesan Xefi do Suco Motael hateten, kontetente ho dezisaun MTCI atu dereitamente halo distribuisaun foos ba povu.

“ Deklarasaun MTCI liu husi Televisaun katak Xefi Suco mak faan ba kios sira maibe tuir ami hateten katak MTCI mak faan ba emprezariu sira ne’e laos xefi suco, “ dehan nia.

Tuir nia, MTCI tenki fo esklarasamentu bainhira hapara prosesu ba distribuisaun foos. (Agapito dos Santos)

Stl- MTCI Uza Milliaun 16 USD, Impota Tan Fos Toneladas Rihun 30

Dili- Ministeriu Turismu Komersiu no Industria (MTCI) uza osan milliaun 16 USD sosa tan fos toneladas rihun 30 nebe'e sei importa husi Thailandia tama TL iha semana ida ne'e nia laran hodi kompleta rezerva ai-han iha rai ida ne'e.

Fos nebe'e sei tama ne'e antesipasaun ho hanoin atu prevene ruptura ba stock fos nian nebee bele mosu iha tempu oin mai iha pais ne'e.

Iha parte seluk,
Ministru TCI mos rekonhese frakeza kontrola ba presu fos ho marka MTCI nebe'e maka emprezariu sira fa'an tuir sira nia gostu.
Ami kontrola presu fos ne'e tenki tuir standarte, maibe ita rona fali iha Lospalos folin ketak, Oe-cusse ketak ne'e mak problema ba ami, katak Ministru TCI.
Maske nune'e, parte MTCI mos prende ona fos barak husi emprezariu nebe'e halimar ho presu. Atu kontrola fos nia folin tuir standarte Governu nian maka presu $12.00 povu mos tenki hamutuk hodi kontrola lesuk.

Timor Post , Kazu Fos MTCI saka 103

Komapania Romante Rekonese “Sala”

Dili – Relasiona ho fos marka MTCI saka 103 ba Viqueque nebe mosu fali iha Dili, husi parte Jestor Armazem Governu iha Manatuto ho Ajensia Transporte kompania Romante rekoinese halo failansu.
Ofisial Inspesaun Alimentar Ekonomika Cipriano Esteve, hateten katak, ninia parte halo ona relatorio hodi intrega ba Inspeitur IAE no Direitor Jeral MTCI atu prosesa.
Nia hateten, foin lalais ne’e ninia parte halo ona inkontru ho ajensia transporte (Kompania Romante) nebe toma konta tranporte tula fos husi armajen governu iha Dili ba Manatuto no jestor armajen iha Manatuto.
Husi enkontru ne’e, ofisial IAE ne’e informa, ajensia transporte ho jestor armazem rekoinese sira nia failansu. “Ne’e ami failansu mos tamba lakonsege atu kontrola ho diak,” katak Esteves ba Timor Post, horseik.
Iha fatin ketak, Direitur Kompania Romante Mariano de Deus haktuir katak, ninia parte rekoinese halo failansu hodi tula fali fos mai iha Dili.
Ninia hatete katak, fos nebe ninia parte tula mai laos fos ilegal, maibe tuir regulamentu husi MTCI katak fos nebe mak tula ba Viqueque labele tula fali mai Dili entaun ninia kompania mos senti halo failansu ida ne’e.
Maibe, nia haktuir, failansu bo’ot iha parte MTCI, liu-liu Jestor Armazem Manatuto, tanba la fo atensaun masimu.
Mariano informa tan katak, ninia parte halo ona inkontru ho MTCI hodi rezolve kestaun refere. “Ho esperensia ida ne’e ami sei tenta atu hadia an sai diak liu tan,” katak nia.
Tuir informasaun nebe Timor Post rekoila katak, fos nebe mak tula mai iha Dili hamutu saka 103, fos refere emprezariu huis Baucau mak hola no faan fali ba emprezariu husi Viqueque no ikus mai emprezariu Viqueque faan fali ba emprezariu ida husi Dili.
Bainhira Timor Post tenta halo komfirmasaun ho responsavel Jestor Armazen Manatuto via telephone, maibe la iha asesu.